.png)
चितवन इन्जिनियरिङ क्याम्पस, रामपुरमा सम्पन्न स्वतन्त्र विद्यार्थी युनियन (स्ववियु) निर्वाचन अहिले व्यापक चर्चा र विवादको केन्द्रमा रहेको छ।
१०औं सेमेस्टरका आर्किटेक्चर विद्यार्थी प्रज्वल अधिकारी स्वतन्त्र उम्मेदवारको रूपमा चुनाव जितेर स्ववियु सभापति बनेका छन्। तर, निर्वाचनपछि भरतपुर महानगरकी मेयर रेणु दाहालको बधाई सन्देश सार्वजनिक भएपछि यो जितलाई लिएर गम्भीर प्रश्नहरू उठ्न थालेका छन्।
स्वतन्त्र उम्मेदवारी कि राजनीतिक संलग्नता ?
प्रज्वल अधिकारीले चुनावअघि आफूलाई स्वतन्त्र उम्मेदवार भएको दाबी गर्दै कुनै पनि राजनीतिक दलसँग आवद्ध नरहेको स्पष्ट पारेका थिए। उनले सामाजिक सञ्जालमार्फत विद्यार्थीहरूको हकहितका लागि स्वतन्त्र रूपमा काम गर्ने प्रतिबद्धता जनाएका थिए।
तर, चुनाव परिणाम आएपछि माओवादी नेतृ रेणु दाहालको पोस्ट सार्वजनिक भयो। उनले फेसबुकमा अनेरास्ववियु क्रान्तिकारीका उम्मेदवारको रूपमा प्रज्वल अधिकारीलाई बधाई दिएकी थिइन्। उनले पोस्टमा माओवादी अध्यक्ष प्रचण्ड, आफ्नै फोटो र प्रज्वल अधिकारीको प्यानल सहितको तस्बिर राख्दै, "क्रान्तिकारीका साथीहरूको सफल कार्यकालको शुभकामना" लेखेकी थिइन्।
यसपछि सामाजिक सञ्जालमा बहस सुरु भयो— के प्रज्वल अधिकारी साँच्चै स्वतन्त्र उम्मेदवार थिए?
राजनीतिक चाल कि संयोग?
सामाजिक सञ्जालमा विभिन्न प्रतिक्रिया आएका छन् :
- "स्वतन्त्र उम्मेदवार भन्दै चुनाव जित्ने, अनि जितेपछि माओवादीको झण्डा बोक्ने ? यो त विद्यार्थीमाथिको ठगी हो!"
- "माओवादीले 'स्वतन्त्र' शब्दको दुरुपयोग गरेर राजनीति गर्नु लज्जास्पद छ।"
कतिपयले भने यो प्रकरणलाई व्यक्तिगत सम्बन्ध वा कृतज्ञताको रूपमा हेर्नुपर्ने बताएका छन्। तर, प्रज्वल अधिकारीले अहिलेसम्म यसबारे कुनै आधिकारिक धारणा सार्वजनिक गरिसकेका छैनन्, जसले झन् संशय बढाएको छ।
स्वतन्त्र राजनीति र हालको परिस्थिति
नेपालमा पछिल्लो समय स्वतन्त्र उम्मेदवारहरूको लहर चलेको छ।
- काठमाडौंमा बालेन शाह
- धरानमा हर्क साम्पाङ
- धनगढीमा गोपी हमाल
यिनले दलहरूसँग टक्कर लिएर चुनाव जितेका थिए।
यस्तै, राष्ट्रिय स्वतन्त्र पार्टी (रास्वपा) ले संसदमा चौथो ठूलो दलको रूपमा उदय गरेको छ।
यो परिस्थितिमा माओवादीले 'स्वतन्त्र' उम्मेदवारको रणनीतिक प्रयोग गरेको हो कि भन्ने प्रश्न उब्जिएको छ।
निष्कर्ष
प्रज्वल अधिकारीको जित साँच्चै स्वतन्त्र विद्यार्थीको विजय हो, वा माओवादीको योजनाबद्ध सफलता हो भन्ने कुरा उनको आगामी कदमले नै निर्धारण गर्नेछ।
यदि उनी विद्यार्थीहरूको हकहितका लागि स्वतन्त्र रूपमा काम गर्छन्, भने यो स्वतन्त्र विद्यार्थी राजनीतिका लागि महत्वपूर्ण जित हुनेछ।
तर, यदि उनी माओवादीका निर्देशनअनुसार अघि बढ्छन्, भने विद्यार्थीहरूलाई 'स्वतन्त्र' को नाममा झुक्याउने राजनीतिक रणनीति मात्र सावित हुनेछ।
विद्यार्थी राजनीतिमा पारदर्शिता, इमानदारी, र विश्वास कायम राख्न, उम्मेदवारहरूको वास्तविक पृष्ठभूमि बुझ्ने नयाँ चेतना आवश्यक देखिन्छ।