.png)
भारतका प्रमुख कन्टेन्ट क्रियटरहरू हाल एसियन न्यूज इन्टरनेशनल (एएनआई) विरुद्ध खुलेर आन्दोलित भएका छन्। आरोप के छ भने, एएनआईले युट्युबरहरूले समाचार क्लिपको केही सेकेन्ड प्रयोग गरेकै आधारमा कपिराइट स्ट्राइक लगाइरहेको छ र पछि धम्की दिँदै लाखौं रुपैयाँ फिरौती मागिरहेको छ।
मोहक मङ्गलको खुलासा: केही सेकेन्डको क्लिपका लागि लाखौंको माग
४१ लाखभन्दा बढी सब्सक्राइबर भएका चर्चित युट्युबर मोहक मङ्गलले हालै एक भिडियोमार्फत एएनआईको रणनीति सार्वजनिक गरेका छन्। उनले बताए अनुसार, उनले आफ्नो दुई भिडियोमा क्रमशः ११ र ९ सेकेन्डको एएनआई फुटेज प्रयोग गरेका थिए। जसको बदलामा एएनआईले कपिराइट स्ट्राइक लगाए र त्यसकै आधारमा ४० लाख भारतीय रुपैयाँको फिरौती तिर्न चेतावनी दियो।
च्यानल मेट्ने धम्की र महँगो सब्सक्रिप्सनको दबाब
मोहकका अनुसार, एएनआईले आठवटा कपिराइट स्ट्राइक लगाउने धम्की दिएको छ, जुन युट्युबको नीति अनुसार च्यानल मेटिने स्थितिमा पुर्याउँछ। साथै, विकल्पस्वरूप ४८ लाख भारतीय रुपैयाँको वार्षिक सब्सक्रिप्सन लिन वा पैसा तिर्नुपर्ने सन्देश दिएको छ।
संवादमा आएको यथार्थ
मोहकको टिमले एएनआईका एक प्रतिनिधिसँग संवाद गर्दा, उनीहरूले अनुमति बिना प्रयोग भएकै कारण स्ट्राइक लगाइएको बताएका छन्। तर जब ईमेलमा कुरा भयो, त्यहाँ भने सीधै लाखौं रुपैयाँ माग गरिएको स्पष्ट भयो।
अन्य क्रियटरहरूको समर्थन
मोहकको भिडियोपछि, थुप्रै भारतीय युट्युबर र डिजिटल क्रियटरहरूले सार्वजनिक रुपमा विरोध जनाएका छन्। चर्चित युट्युबर ध्रुव राठीले मोहकलाई समर्थन जनाउँदै लेखे, "यो त जबर्जस्ती असुली हो, हामी सबैले एकजुट हुनुपर्छ।"
नितिश राजपुतले त युट्युबसँगै अपिल गर्दै भनेका छन्, "क्रियटरले बर्षौं मेहनत गरेर बनाएको च्यानल यसरी नस्ट हुन नदिन युट्युबले कडा कदम चाल्नुपर्छ।"
दुई सेकेन्डको क्लिपका लागि १५ लाख?
युट्युबर थगेशले पनि आफ्ना अनुभव सुनाउँदै बताए कि उनले केवल दुई सेकेन्डको फुटेज प्रयोग गरे वापत एएनआईले १५ लाख मागेको थियो। यस्तो अवैध धम्की प्रवृत्तिले कन्टेन्ट क्रियटरलाई झन बढी डर र असहाय बनाइरहेको छ।
प्लेटफर्म क्रियटरको, चोरहरूको होइन
कमेडियन तथा युट्युबर कुनाल कम्राले त एएनआईलाई युट्युबबाट पूर्ण प्रतिबन्ध लगाउन माग गर्दै लेखेका छन्, "प्लेटफर्म क्रियटरले बनाउँछन्, एएनआई जस्ता ब्ल्याकमेल गर्नेहरूले होइन।"
इन्टरनेटमा एएनआई विरोधी ट्रेन्ड
मोहकको भिडियो सार्वजनिक भएपछि सामाजिक सञ्जालमा एएनआई विरुद्ध व्यापक आन्दोलन शुरू भएको छ। धेरैले एएनआईलाई अनसब्स्क्राइब गर्न, त्यसका च्यानलहरू ब्लक गर्न र मोहकजस्ता क्रियटरलाई समर्थन गर्न आह्वान गरेका छन्।
यसअघि पनि एएनआईले असुलेको पुष्टि
मोहकको घटनासँगै पहिले अन्य कन्टेन्ट क्रियटरहरूले पनि च्यानल बचाउन एएनआईलाई लाखौं तिरेको जानकारी बाहिर आइसकेको छ। यद्यपि उनीहरूले डरले खुलासा गर्न सकेका थिएनन्।
निष्कर्ष
यस विवादले एकपटक फेरि देखाएको छ कि डिजिटल क्रियटरको स्वतन्त्रता अझै सुरक्षित छैन। कपिराइटको नाममा गरिएको यस्तो ब्ल्याकमेलले क्रियटर समुदायलाई मात्र होइन, डिजिटल स्वतन्त्रतामाथि पनि प्रहार गरेको छ। अहिलेको अवस्थामा युट्युबले निष्पक्ष भएर उचित कदम चाल्न आवश्यक छ, ताकि कन्टेन्ट क्रियटरहरू सुरक्षित महसुस गर्न सकून् र यस्तो दादागिरीको अन्त्य होस्।