.png)
शान्तिबाटिकामा एमाले र राजावादीबीच भिडन्त टार्न प्रहरीको सुरक्षा रणनीति, राजावादीलाई जमलतर्फ सारियो
काठमाडौंको शान्तिबाटिकामा नेकपा एमाले र राजावादी समर्थकहरूबीच सम्भावित भिडन्त रोक्न प्रहरीले सतर्कता अपनाएको छ। गणतन्त्र दिवसको अवसरमा एमालेले उत्सव र्याली आयोजना गर्दै शान्तिबाटिकातर्फ अघि बढेपछि त्यहाँ पहिलेदेखि भेला रहेका राजावादी समर्थकहरूलाई प्रहरीले हटाएको हो।
राजावादीहरूलाई जमलतर्फ सारियो
शान्तिबाटिकामा पहिलेबाटै उपस्थित राजावादीहरूलाई प्रहरीले जमलतर्फ पठाएको छ। प्रहरी प्रशासनका अनुसार सम्भावित झडप वा दुर्घटना टार्न यस्तो व्यवस्था गरिएको हो। हाल रत्नपार्क क्षेत्रको दृश्य हेर्दा, वारिपट्टि राजावादी, पारिपट्टि एमाले समर्थक र बीचमा बाक्लो संख्यामा सुरक्षाकर्मीहरू तैनाथ छन्।
भिडन्त रोक्न कडाई
प्रहरीले स्पष्ट रूपमा कुनै पनि दुई पक्षलाई आमने-सामने नपार्ने नीति अवलम्बन गरेको छ। त्यसैअनुसार, २ बजेपछि मात्रै राजावादी समर्थकहरूलाई शान्तिबाटिकातर्फ जान अनुमति दिने निर्णय लिइएको प्रहरी स्रोतले जानकारी दिएको छ।
एमालेको उत्सव र्याली
गणतन्त्र दिवसको अवसरमा नेकपा एमालेले ‘गणतन्त्रको उत्सव’ मनाउने भन्दै राजधानीका विभिन्न स्थानबाट र्याली निकालेको छ। ती र्यालीहरू भृकुटीमण्डपमा भेला भई शान्तिबाटिकातर्फ अघि बढ्ने र अन्ततः सभामा परिणत हुने कार्यक्रम रहेको एमालेले जनाएको छ।